हमर भाखा, हमर खबर : SCERT म पारंपरिक रूप से मनाए गीस हरेली तिहार, संचालक राजेश राणा हर वृक्षारोपण करके दिस हरियाली के संदेश
रायपुर 17 जुलाई 2023। छत्तीसगढ़ के लोक पारंपरिक पर्व सावन महीना के अमावस में मनाए जाने वाला हरेली के तिहार आज एससीईआरटी शंकर नगर रायपुर में पारंपरिक रूप से मनाए गीस। एससीईआरटी के संचालक राजेश सिंह राणा के अगुवाई में कार्यलय के रापा, कुदारी, गैती सबो अवजार मन ल शुघर धो के, सबके पूजा करे गीस। दिया बार के, छत्तीसगढ़ महतारी ल माला चढाय गीस, अवजार मन ल हाथा दे के टीका लगाके आरती करे गीस।
छत्तीसगढ़ के व्यंजन ठेठरी, खुर्मी, एईरसा, बोबरा के भोग लगाए गीस। श्रीफल नारियल चढ़ाके, ओकर प्रसाद बांटे गीस। ए मौका म संचालक महोदय ल प्रशिक्षण शाखा के प्रकोष्ठ प्रभारी सुनील मिश्रा हर छत्तीसगढ़िया गमछा भेट करके सम्मान करीस। प्रशिक्षण समन्वय गिरजा शंकर शुक्ला हर तिहार के बारे में जानकारी ल सबके बीच में बताइस।
एससीईआरटी के कोला म संचालक राजेश सिंह राणा कती ले फर वाला पौधा लगा के हरियली के संदेश देत हुए कहिस की ये तिहार हर छत्तीसगढ़ महतारी, किसान आऊ किसानी के जतका अवजार के पूजा करे के दिन होय, जेमा सबो मनखे मन के बीच में मया हर बढ़थे। ये मौका में एससीईआरटी के कर्मचारी, शिक्षक, एनजीओ मन उपस्थित रहीन।
